கொலைவெறியூட்டும் காதல் நாடகங்கள்

பண்பாடு சார்ந்த நம் பாரம்பரிய வாழ்க்கை முறை பிற்போக்கானது என்றும் மனம்போனபடி வாழ்வதுதான் நாகரிகமானது என்று மூளைச்சலவை செய்யப்பட்டுள்ள இளம் பெண்களின் வாழ்வு எந்த அளவுக்கு சீரழிந்து நிற்கிறது என்பதைப் பாருங்கள்.

பெற்றோர் சொல் கேளாதீர்; கண்டவனோடு கண்ட நேரத்தில் ஊர் சுற்றுங்கள்; எல்லாவற்றையும் திறந்து போட்டுக்கொண்டு உடையணியுங்கள், அது உங்கள் உரிமை, அதுதான் பெண் விடுதலை; காதல்(காமம்)தான் வாழ்வில் முக்கியமான விஷயம், அதற்காக எதையும் இழக்கலாம் - இப்படியெல்லாம் சினிமாக்களும் ஊடகங்களும், பெண்ணியவாதிகளும் ஓயாமல் போதனை செய்து கொண்டிருக்கிறார்கள். அதன் விளைவு? ந்மக்கென்று இருந்த பாரம்பரிய பண்பாடுகளை இழந்து “கண்டதே காட்சி, கொண்டதே கோலம்” என்று நிற்கிறோம்.

குடுமப வாழ்வு முறையையே சிதைத்து தகப்பன் பெயர் தெரியாத மக்களைக் கொண்ட சமுதாயமாக நம் நாட்டை மாற்றுவதற்கு கங்கணம் கட்டிக்கொண்டு பல அரசு மற்றும் அரசு சாரா அமைப்புகள் செயல்பட்டுக் கொண்டிருக்கின்றன. இதற்கு பல மேலை நாடுகளிலிருந்து கோடி கோடியாகப் பணம் வருகிறது.

கட்டுக்கோப்பான குடும்ப வாழ்வு முறையையும், சேமிப்பு மனப்பான்மையையும் ஒழித்துவிட்டல் மேலை நாகரிகத்திற்கு மக்கள் முழுதும் அடிமையாகி கடன் வாங்குவதிலும், படாடோபங்களிலும், டம்பாச்சாரி சிலவுகளிலும் ஈடுபட்டு ஒரு சூன்யமான நிலையை நோக்கி நம் சமுதாயத்தை செலுத்திவிடலாம் என்று முழுமூச்சுடன் செயல்பட்டுக் கொண்டிருக்கிறார்கள். இந்த முயற்சியில் அவர்களுக்கு வெற்றியும் கிட்டிக் கொண்டிருக்கிறது. அதற்கு இசைவாகத்தான் நம் சமூகத்தை உருக்குலைக்கும் 498A போன்ற சட்டங்கள் இயற்றப்படுகின்றன.

இப்போது இந்த செய்தியை வாசியுங்கள்:-

திருச்சி மாணவி தற்கொலை வழக்கில் திடீர் திருப்பம்: தோழி நித்யா கொலை செய்து எரிக்கப்பட்டாரா? பிரேத பரிசோதனையில் திடுக்கிடும் தகவல்கள்

திருச்சி, ஜன.12-2009 - செய்தி - தினத்தந்தி

காதலனுடன் உயிரோடு திரும்பி வந்த கல்லூரி மாணவியின் தோழி நித்யா கொலை செய்யப்பட்டு எரிக்கப்பட்டாரா? என்ற சந்தேகத்தின் அடிப்படையில் தீவிர விசாரணை நடந்து வருகிறது.


திருச்சி கருமண்டபம் அசோக் நகரை சேர்ந்த சுப்பிரமணியன்- ஜோதி தம்பதிகளின் மகள் வசந்தி(வயது 20). இவர் பிராட்டினிரில் ஒரு கல்லூரியில் பி.எஸ்.சி. 3-ம் ஆண்டு படித்து வந்தார். வயிற்று வலி காரணமாக வசந்தி, கடந்த மாதம் 26-ந் தேதி வீட்டில் தீக்குளித்து தற்கொலை செய்து கொண்டதாக கண்டோன்மெண்ட் போலீசில் சுப்பிரமணியன் புகார் கொடுத்தார்.


இதனையடுத்து போலீசார் ஒரு வழக்கு பதிவு செய்து இறந்து கிடந்த பெண்ணின் உடலை பிரேத பரிசோதனைக்கு அனுப்பி வைத்தனர். பிரேத பரிசோதனைக்கு பின்னர் அந்த பெண்ணின் உடலை ஓயாமரி சுடுகாட்டில் சுப்பிரமணியன் குடும்பத்தினர் தகனம் செய்தனர்.

இந்த நிலையில் வசந்தி தீக்குளித்து தற்கொலை செய்து கொண்டதாக கூறப்பட்ட அதே நாளில் திருச்சியை அடுத்த சோமரசம்பேட்டை தாயனூரைச் சேர்ந்த மல்லிகாவின் மகள் நித்யா(20) மாயமானாள். நித்யாவை பல்வேறு இடங்களில் அவரது தாய் மல்லிகா தேடினார். ஆனால் எங்கும் கிடைக்காததால் சோமரசம்பேட்டை போலீஸ் நிலையத்தில் தனது மகள் மாயமாகி விட்டதாக ஒரு புகார் மனு கொடுத்தார்.

இந்த நிலையில் தீக்குளித்து இறந்ததாக கூறப்பட்ட வசந்தி நேற்று முன்தினம் தனது காதலன் வெங்கடேசோடு உயிருடன் திரும்பி வந்தார். திருச்சி மாநகர போலீஸ் கமிஷனர் அலெக்சாண்டர் மோகனிடம் வசந்தி ஒரு மனு கொடுத்தார். அந்த மனுவில், தங்கள் காதலுக்கு எனது பெற்றோர் எதிர்ப்பு தெரிவித்ததால் கடந்த ஆகஸ்டு மாதம் 8-ந் தேதி இருவரும் பதிவு திருமணம் செய்து கொண்டதாகவும், தங்களை சேர்ந்து வாழ அனுமதிக்க வேண்டும் என்றும் அந்த மனுவில் அவர் கூறி இருந்தார்.

இறந்து போனதாக பெற்றோரால் கூறப்பட்ட வசந்தி தனது காதலனோடு உயிருடன் திரும்பி வந்தது இந்த வழக்கில் திடீர் திருப்பத்தை ஏற்படுத்தியது. அதே நேரத்தில் வசந்தியின் வீட்டில் உடல் கருகி இறந்து கிடந்த பெண் யார்? அது ஏற்கனவே காணாமல் போனதாக சோமரசம் பேட்டை போலீஸ் நிலையத்தில் புகார் அளிக்கப்பட்ட நித்யாவாக இருக்கலாமோ என்ற சந்தேகம் ஏற்பட்டது.

தோழிகளான வசந்தியும், நித்யாவும் ஒருவரையே (வெங்கடேஷ்) தீவிரமாக காதலித்து வந்ததால்தான் இந்த சம்பவம் நடைபெற்றிருக்க கூடும் என்ற அடிப்படையிலும் போலீசார் விசாரணை நடத்தி வருகின்றனர்.

வசந்தியின் காதலுக்கு எதிர்ப்பு தெரிவிக்க வந்த இடத்தில் நித்யா தீ வைத்து கொளுத்தப்பட்டிருக்கலாம், அல்லது தனது காதலுக்கு குறுக்கே நிற்கும் வசந்தியை பழிவாங்குவதற்காக நித்யாவே தற்கொலை செய்து கொண்டிருக்கலாம் என்றும் போலீசார் கருதுகிறார்கள்.

இதனால்தான் பயந்து போய் வீட்டை விட்டு வசந்தி காதலருடன் தப்பி ஓடியிருக்கலாம் என்றும் அதனை மறைக்கவே வசந்தியின் பெற்றோர் நாடகமாடி இருக்கலாம் என்றும் சந்தேகிக்கப்படுகிறது.

போலீசார் நடத்திய முதல் கட்ட விசாரணையில் வசந்தியின் வீட்டில் இறந்து கிடந்தது நித்யா தான் என்று உறுதி செய்யப்பட்டு உள்ளது. இதைத்தொடர்ந்து, இந்த வழக்கில் உண்மை நிலையை தெரிந்து கொள்வதற்காகவும், வசந்தியின் தந்தை சுப்பிரமணியன், அவரது மகன்களை கண்டோன்மெண்ட் போலீசார் பிடித்து சென்று ரகசிய இடத்தில் வைத்து விசாரணை நடத்தி வருகிறார்கள். இதில் போலீசாருக்கு அதிர்ச்சி தகவல்கள் கிடைத்து உள்ளன.

இந்த வழக்கில் திடீர் திருப்பங்கள் ஏற்பட்டு வருவதால், உண்மை நிலையை அறிய எரிந்த நிலையில் கைப்பற்றப்பட்ட பெண்ணின் உடலுக்கு நடத்தப்பட்ட பிரேத பரிசோதனை அறிக்கை முக்கிய சான்றாக எடுத்துக்கொள்ளப்பட இருக்கிறது. பிரேத பரிசோதனை அறிக்கையில் இறந்த பெண்ணின் உடலில் தீக்காயம் ஏற்படுவதற்கு சுமார் 4 மணி நேரத்திற்கு முன்பே உயிர் பிரிந்து இருக்கலாம் என்றும், உடலில் தலைப்பகுதியில் காயங்களுக்கான அறிகுறிகள் இருப்பதாகவும் சந்தேகங்கள் எழுப்பப்பட்டு இருக்கிறது.

இதனால் நித்யா அடித்து கொல்லப்பட்டு அதன் பின்னர் அவரது உடல் எரிக்கப்பட்டிருக்கலாமோ என்ற சந்தேகம் ஏற்பட்டு உள்ளது. எனவே பிரேத பரிசோதனை அறிக்கையின் அடிப்படையில் போலீசார் தீவிர புலன் விசாரணை நடத்தினால் மேலும் பல திடுக்கிடும் தகவல்கள் வெளிவரும் என எதிர்பார்க்கப்படுகிறது.

முறையாக விசாரிக்காமல் வழக்கை முடிவுக் கொண்டுவந்த திருச்சி கண்டோன்மெண்ட் போலீசார் மீது கடும் நடவடிக்கை எடுக்கப்படும் என்று உயர் போலீஸ் அதிகாரி ஒருவர் தெரிவித்தார்